Il racconto dell'arabo scomparso ha stimolato al vate(r) queste mirabili rime baciate.
I avemo conussudi da vissin,Jack Traforo e Bill Cava,
Tom Cemento e Al Giara,
Jim Sbancamento e Sam Palassina,
soci de l'Economia sbarassina.
Come 'na roja in la molonara,
la bela Verona i la ciava
e i la riduse a pan e pessìn.
Traforo da Marsana l'è 'n semoloto.
L'è 'na pértega stegagnada mal,
g'à amighi importanti, in comun,
par capirse, quei dei quatro sassi
e quei che slonga la pila, i Massi.
Quei da la Valpolesela, Fane o Prun,
el vorìa incontrarli al Saval,
se no se intromete el bon Speroto.
L'è nato su l'Adese a la Giarina,
Al Giara, el duro. Passando i ani,
l'à fato un mucio de strada.
Trasferendose su in montagna,
su a Sant'Ana, no'l sparagna:
su el Lofa el s'à magnà 'na contrada,
no lassando trace e gnanca dani.
El monte l'è sparìo? Fadina!
Bill Cava de Al Giara l'è parente.
L'è nato da le parte del Vajo Galina.
Po' l'è cressudo darente Dossobon,
par intendarse ando gh'è le risorgive.
Lì el 'na fato védar le so gengive:
'na boca verta con drento un piròn,
che se magna la conoide atesina...
Lassando gnente ma propio gnente.
El Giara el ghe dà volentieri 'na man
al so vecio amigo Cemento:
un sgrébano che vive a Fumane,
su par la Val dei Progni, solitario,
I dise che'l sia sede(me)ntario,
ma spesso i lo vede a Maredane.
Là i lo ciama el porla, un portento!
Anca da griso, quel fiol de'n can.
Jim Sbancamento l'è sta un sensal:
sensa de lu, afari o matrimoni,
Giara, Cava e Cemento i lo sa ben,
mai i se sarìa podùo combinar...
E Palassina s'avarìa fato ciavar!
Invesse Jim par fortuna el tien,
come Gatamelata el g'à tri cojoni
che a sbaterghe dosso, te te fé mal.
L'è un vero mutante, Sam Palassina.
L'è un polimorfo, con mile identità:
vileta, capanon o condominio,
borgo dei ulivi o quartier dormitorio.
El so nemigo l'è el poro teritorio,
portando el paesagio al sterminio.
Qua tuto l'è sta ormai negrarizzà...
E noantri, i n'à ciavà... ala pegorina!
Si! I t'à cantà, Economia Sbarassina.
Come dona canone, 'na sboldrona:
te continui a magnar, con la bulimia.
Te te ingrassi e a ti te piase farlo.
svilupoe cressita j'è el to tarlo.
'Cura dimagrante? Na passìa!
E cussì te sfigurà la Bela Verona,
che più i le incementa, e più i la sassìna.
