El ris-cio l'è che oltre al papà del Gnoco, se cuchemo anca el papi de la Gnoca. Meio no pensarghe e tornar indrio co la memoria ai bei tempi.
Da bocia me mama g'avea piaserche deventasse dotor o ingegner.
"Michele, chela che t'à cuna'
studia e po‘ va al'Universita'
Invesse la me grossa ambission
l'era quela de deventar Macaron,
no ala corte de Giorgio Gioco
ma a coela del Papa' del Gnoco.
Po' con sta panza nar a sfilar
co i cari al Venardi Gnocolar:
capel a ponta, vestito rosso
tastando coà e la' un gosso.
Tra coriandoli e stele filanti,
magiorets e bande de musicanti.
Re Teodorico senta' in scano,
el Duca dela Pignata e Reboano.
De boto me rivedo bocieta
pronto a traciar 'na "seta":
al passajo del Dio de l'Oro
e saltar fora vestio da" Zoro".
Compagnado da me sorele
trucade e vestie da singarele,
co le mame anca pi‘ contente
in meso al ciassar de la jente.
Impressiona‘ da l‘importansa
de le comende su la pansa
e dala generosita' dei figuranti
che tiraa momoni e stele filanti
Me sovien un carneval caregoto:
minestron e piu' de coalche goto;
damejane e paneti in via Sole
cassadi su tra l'ostaria e le scole.
Bateimo i denti, noantri bocieti
e sghimaemo 'na fila de poareti
la' par magnar e bear con avidita'
servidi dal Lana e da me papa':
poesia de' n Carneval antico,
inventado da Tomaso da Vico
e cor de gente umile e bona
cor grando cosita de Verona!
Michele Dall'O'
Kiel, 10.11.2000
